LILLESTRØM: Han har kjent seg trygg like sidan valkomiteens innstilling vart kjend. No når tinget er i gang, kjenner han likevel at ein slags nervøsitet kjem sigande.

– Eg er oppspilt, tent. Det blir ei nerve rundt det når tinget møtest, seier den tidlegare daglege leiaren i Sogndal.

Han er innstilt av valkomiteen til å bli ny fotballpresident etter Sondre Kåfjord. Men Kåfjord vil ikkje gi seg utan sverdslag og har valt å stilla som motkandidat på tinget. Det teiknar til å bli eit tett og kanskje ikkje berre venlegsinna oppgjer om det øvste leiarvervet i norsk fotball.

Temperatur

I går var det i det minste tilløp til temperatur då dei to møttest til direktesend TV-duell i samband med opninga av tinget. Av ein av Kåfjords våpendragarar, samfunnsdebattanten Erling Fossen, blei Hallén i eit innlegg i VG karakterisert som ein med så dårleg utstråling at blomane visnar rundt han.

41-åringen frå Alversund ler av omtalen. Sjølv uttalar han seg både rundare og rausare om konkurrenten.

– Sondre Kåfjord er ein mann med eit stort fotballhjarte. Han har site 14 år i forbundsstyret. No fortener han ein pause.

Valet er i morgon. I mellomtida er Yngve Hallén delegat nummer 224 på fotballtinget.

– Med ei stemme, som alle dei andre.

Får han sjansen til å bli norsk fotballs øvste valde leiar kjem han til å bruka stemma si aktivt. Han er oppteken av å forankra alle vedtak i fotballdjupet, å syta for at alle blir tekne med på råd, heller enn å tre vedtak ned over hovuda på folk.

«Mitt team» det beste

– Eg har sett mange meiningslause ting bli gjennomført. Det er lettare å få ting gjort når ein ser korleis verda verkeleg ser ut, seier Hallén.

Han omtalar forslaget til nytt forbundsstyre som «mitt team», og han er overtydd om at hans team vil vera det beste til å leia norsk fotball inn i framtida.

– Eg er blitt kjend med folka undervegs, og eg har funne svært brei og variert kompetanse i gruppa.

Av somme blir han skulda for å vera toppfotballens mann. Det blæs han av.

– Når du har bakgrunn frå ei bygd som Sogndal, må du nødvendigvis ha ei sterk forankring i breiddefotballen. Skal ein vinna gehør for den storstilte anleggsutbygginga vi har hatt i Sogndal, må breiddenivået vera med på det. Var det for toppen, trong vi berre to baner i Sogndal. Vi har bygd åtte. Fem prosent av kapasiteten på idrettssenteret blir brukt av toppfotballen, 95 prosent av breiddenivået, understrekar Yngve Hallén.

Halvering av 3. divisjon

Inn mot tinget har det vore travle dagar med mykje mediemerksemd. Han går til valet med litt same slagord som Barack Obama gjorde, eit val for endring.

– Eg kjenner meg trygg på at mitt team kjem til å vinna, men heilt trygg kan ein aldri vera. Såpass respekt skal ein ha for tingdelegatane, seier Yngve Hallén.

Meir enn 20 pressefolk er akkreditert til fotballtinget. Dei fleste av dei er aller mest opptekne av valet og duellen mellom Kåfjord og Hallén. Men meir enn 70 små og store forslag skal tinget også ha ei meining om. Det som det knyter seg mest spaning til, er forslaget til nytt seriesystem for 3. divisjon. Blir det vedteke, vil det medføra ei halvering av talet på lag i divisjonen.